الناشر و رئيس التحرير : محمود كريشان
التاريخ : 2019-03-05
الوقت : 02:20 pm

د. ابوعمارة يكتب: يوميات مدير مدرسة حلقة (12)

الهلال نيوز/ بقلم الدكتور محمد أبوعمارة
مدير عام مدارس الرأي
- الظلم ظلمات يا دكتور والله حرام عليكم تستعبدوا الناس وقد ولدتهم أمهاتهم أحراراً، حسبي الله ونعم الوكيل بس...
- انتظر ماذا تقول؟!! من الذي ظلمك يا استاذ!!
- أنتوأ !!
- مين احنا؟!
- مدير قسم الذكور...
- بإيش ظلمك؟!
- وجهلي استجواب!!
- طيب وين المشكلة ؟!
- أنا بعد هالعمر وهالخبرة وهالعطاء وهالتضحية وهالشيب بيحي مدير فلعوص يعطيني استجواب..
- لو سمحت راعي الفاظك !!
- بترضى يا دكتور، يجي شب بعمر أولادي يوجهلي استجواب؟
- طيب وين المشكلة، الاستجواب هو سؤال يحتاج لإجابة، وليس عقوبة ليش أنت معتبر الموضوع فيه اهانة لحضرتك!!
- لأني مظلوم وأنت بتعرف بالظلم وساكت، والساكت عن الحق شيطان أخرس يا دكتور... شيطان أخرس يا دكتور... شيطان أخرس يا دكتووووور.....
- وقفت وقمت بالتصفيق ... برافووو عليك المشهد كتير حلو...
- يعني بتتخوث علي يا دكتور
- يا رجل شو موضوع الاستجواب!!
- السيد المدير تبعك بستدعيني لعنده من الصبح وبدل ما يطلبلي فنجان قهوة بحكيلي بنشافة خوذ جاوب على الاستجواب وبطريقة مذلة... متى استعبدتم الناس وقد ولدتهم أمهاتهم أحراراً... قل لي متى استعبدتم الناس وقد ولدتهم أمهاتهم أحراراً... متى استعبدتم الناس وقد...
- أنا مقاطعاً... سايق عليك الله ما تكرر الجملة أكثر من مرة... طيب يا حبيبي شو كان محتوى الاستجواب؟
- تخيل بستجوبني على غلطة غيري!!
- مين غيرك وشو الموضوع يا استاذ!!
- كان عندي حصة لغة عربية على الصف الثامن جـ
- طيب
- ورحت بأمان الله على الصف الثامن جـ
- ممتاز
- دخلت الصف الثامن جـ وما لقيت ولا طالب بالصف...
- ليش وين كاينين؟؟
- نفس السؤال اللي سألته لمشرف الطابق
- شو حكالك...
- المشكلة إنه حكالي أنه ما بيعرف وين الطلاب.. طيب أنت لومكاني بهاي الحالة شو بتعمل؟
- بنزل اشوفهم بالساحة..
- وهاد بالزبط اللي عملته، نزلت يا حفيظ السلامة على الساحة أدور على الطلاب
- طيب
- وأنا نازل على الساحة مريت زي ما أنت عارف بجنب المقصف مهو بالطريق فقلت اجيب كاسة شاي اشربها بالطريق...
- طيب
- وبالفعل حملت كاسة الشاي ومشيت بالممر اللي بيوصل للساحة، وأنا نازل على الدرج كان في طلاب صف أول بركضوا حاولت، والله يا دكتور حاولت، ورحمة والدي إني حاولت ...
- حاولت شو يا استاذ
- حاولت إني ما اصطدم ولا بطفل منهم ولكن للأسف كان في واحد بركض وارتطم فيي وللأسف انكب الشاي على الملابس...
- انا مقاطعاً... الطفل !! الطفل!! صار فيه اشي؟؟
- ول، الطفل هو اللي هامك أما أنا الله لا يردني...
- لا مش القصد بس هدول أمانة برقبتي... طمني صار فيه إشي؟!!
- لا يا سيدي اتطمن... ما صار فيه اشي
- الحمد لله
- طيب اسأل عني ولا أنا إبن البطة السودا
- طيب شو صار معك؟!
- انكب الشاي على كل ملابسي وغرقت!!
- طيب الحمد لله على سلامتك وشو صار معك!!
- اتبهدلت والتعن ابو فاطسي... فكرت شو بدي أعمل لقيت أنه أحسن شي أنه أروح على غرفة المعلمين وانشف ملابسي...
- طيب كان أخذت مغادرة وروحت على البيت!!
- لاء لاء لا... ارجوك وين الأمانة العلمية، وين الضمير، وين الأخلاق وين...
- يا رجل أنت مبالغ فيك... انجز، شو صار معك!!
- دخلت غرفة المعلمين وشلحت الجاكيت لاقيت انه القميص كمان مبلول...
- طيب
- شلحت القميص..
- اوعك تحكي إنه في شي تاني مبلول!!
- للاسف الشديد آه... كله مبلول!!
- يا زلمة هاي كاسة شاي ولا تنك شاي!!
- هادا اللي صار عاد شو أعملك!!
- طيب وشلحت كل ملابسك!!
- نعم، شلحت كل ملابسي ...وحطيتهم على التدفئة لحتى ينشفوا...
- طيب وشو صار؟!
- أتاري طلاب الصف الثامن جـ كانوا بالمختبر وطلعوا من المختبر على الصف وما لاقوني ودوروا علي وفجأة دخل طالب علي يسأل وشافني وفرط ضحك... وخلال ثواني يا دكتور لقيت طلاب الصف الثامن جـ كلهم عندي واللي ماسك تلفون بصور واللي ببث لايف واللي على السناب والله اشتهرت يا دكتور...
- ما شاء الله، حكيتلي اللي ببث واللي على السناب وحضرتك فرحان ومسرور!!
- لا والله يا دكتور،ما انبسطت لو تعرف ليش ؟
-ليش ؟
- لأني ما كنت مزبط شعري!!
- وزعلان لأنه مدير وجهلك استجواب!! ولك والله لازم مش استجواب لازم يحيل اوراقك للمفتي العام، ولازم مش بس استجواب لازم... لازم... وركضت نحوه مسرعاً، وهرب المعلم وأنا خلفه وأنادي يا شباب امسكوه... أمسكوه... ولا أدري كيف استطاع الهرب قبل أن أمسك به...
وبعدها عدت إلى مكتبي وأمسكت هاتفي النقال لأشاهد صوره المبثوثة على النت... فعلاً لقد كان شعره بحاجة إلى ترتيب؟!!

بقلم الدكتور محمد أبوعمارة
مدير عام مدارس الرأي
   
الإسم
نص التعليق
تتم مراجعة كافة التعليقات ،وتنشر في حال الموافقة عليها فقط ،
ويحتفظ موقع 'الهلال نيوز الإخباري' بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أو خروجا عن الموضوع المطروح ، علما ان التعليقات تعبر عن أصحابها فقط .

الاردن الاخبار , اخبار الاردن, عاجل من الاردن , المحافظات الاردنية ,الطقس بالاردن
اخبار الاردن
الاردن اليوم
أكشن اليوم العربي Action Today Action Today